Í þessari spennandi prjónaferð til Biella og Langhe í Piemonte sameinast prjónaskapur, ítölsk matarmenning og stórbrotin náttúra í einstaka upplifun. Ferðin hefst í Miagliano sem er í Biella héraði. Bærinn Miagliano hefur viðurnefnið ,,città della lana" ullarbærinn og þar kynn­umst við ullarframleiðslu, rótgróinni handverkshefð og skoðum girnilegar garnhillur sem kveikja á innblæstri.

Á leiðinni í Casa Maja stoppum við í rómuðu garnbúðinni Wool Crossing í Tórínó áður en við komum á áfangastað þar sem Maja Ragg töfrar fram aperitívo og síðan kvöldverð sem við gæðum okkur á úti á veröndinni. Að loknum kvöldverði fara prjónarnir á loft og dreypt er á góðum drykk.

Við hjólum um sveitina til Barbaresco og Neive, njótum útsýnis yfir víngarða og stoppum á kaffihúsum og vínhúsum þar sem prjónarnir fylgja að sjálfsögðu með. Þær sem kjósa rólegri daga geta dvalið í Casa Maja, prjónað í kyrrðinni og notið útsýnisins yfir hæðirnar. Ferðin inniheldur einnig vínsmökkun hjá Poderi Colla, grillkvöld í Casa Maja og líflegan markaðsdag í Nizza Monferrato þar sem litir, hráefni og gleði ítalskrar matargerðar fléttast saman við prjónaskapinn. Á heimleið stöldrum við við í Alba, fáum okkur espresso eða vín og prjónum eins og enginn sé morgundagurinn.

Þetta er ferð fyrir prjónara sem vilja sameina handverk, menningu, mat og vín— þar sem hver dagur býður upp á góðar prjónastundir, ljúffengan bita og innblástur sem fylgir heim í prjónakörfuna.